4 ຄົນ · ປານກາງ · 60 ນາທີ · ₭ ຖືກ

ໝົກກົບ ແມ່ນ ອາຫານ ພື້ນບ້ານ , ເປັນ ອາຫານທ້ອງຖິ່ນ ຕາມ ທ້ອງໄຮ່ ທ້ອງນາ ທີ່ຫລາຍຄົນມັກ. ລົດຊາດ ອອກແນວ ບ້ານນາ, ເວລາ ໝົກມີກິ່ນ ຫອມໆ ເຕະດັງ, ແກະອອກມາ ກິນກັບເຂົ້າໜຽວ, ຟັງສຽງ ຝົນໄປນຳ ເຂົ້າກັນສຸດໆ.

ວິດິໂອ

ເຄື່ອງປຸງ

• ກົບ 1 ກິໂລ, ເອົາກົບນ້ອຍ, ຄົວ ໃຫ້ລຽບລ້ອຍ ແລະ ລ້າງນ້ຳ ໃຫ້ສະອາດ
• ຫົວສີໄຄ 3 ກ້ານ, ຊອຍບາງ
• ຫອມບົ່ວແດງ 3 ຫົວ, ປອກ ແລະ ຊອຍ
• ຂ່າ 5 ປ່ຽງ, ເລືອກເອົາ ຂ່າອ່ອນ
• ເຜັດດິບ 6 ໜ່ວຍ, ໜ້ອຍ ຫລາຍ ຕາມໃຈ
• ຜັກຂະແຍງ 1 ຖ້ວຍນ້ອຍ, ຊອຍຕ່ອນນ້ອຍ
• ຫອມບົ່ວໃບ 3 ກ້ານ, ຊອຍຕ່ອນນ້ອຍ
• ໃບຂີ້ຫູດ 8 ໃບ
• ເກືອ 1 ບ່ວງແກງ
• ນ້ຳປາ 1 ບ່ວງແກງ

ວິທີເຮັດ

1. ຕຳ ຫົວສີໄຄ, ຫອມບົ່ວແດງ, ໝາກເຜັດ, ຫົວຂ່າ , ເກືອ ໃຫ້ແຫລກດີ

2. ນຳເຄື່ອງຕຳ ໄປຖອກໃສ່ ຊາມກົບ ແລ້ວ ໃສ່ໃບຂີ້ຫູດ, ຜັກຂະແຍງຊອຍ, ຫອມບົ່ວໃບ ຊອຍ, ປຸງລົດ ດ້ວຍນ້ຳປາ. ແລ້ວຄົນ ໃຫ້ເຂົ້າກັນ. ໝັກໄວ້ 30 ນາທີ.

3. ຕາກ ໃບຕອງໃຫ້ ອ່ອນ ແລ້ວນຳ ມາຫໍ່ ກົບທີ່ໝັກໄວ້ນັ້ນ. ເຮັດໝົກ ນ້ອຍ ໄດ້ ປະມານ 3 ໝົກ. ຢ່າລືມ ຍັດ ຫົວສີໄຄ ທຸບ ໃສ່ ແຕ່ລະ ຫໍ່ໝົກນຳ ເພື່ອໃຫ້ ສຸກໄວ ແລະ ເພີ່ມກິ່ນຫອມ.

4. ເອົາໄປໜຶ້ງ ປະມານ 30 ນາທີ. ກຽມ ແກະ ຫໍ່ໝົກ ພ້ອມ ແຊບໄດ້ :)